陳嘉寶 x 賴慰玲專訪：只想不老唔要長生！

陳嘉寶和賴慰玲背景不同，一個由模特兒轉型演戲；一個舞台劇界出身，卻因為在 2014 年參演曾志偉監製的劇集《女人俱樂部》結緣，最近在劇集《殭》再合作。

兩年多來，二人已建立了深厚姊妹情，無論戲裏戲外總是「雞啄唔斷」，齊齊接受訪問時笑聲不少，難得的是，嘻嘻哈哈外，她們還會互勵互勉力求進步，她倆連傾拍攝通告都可以講兩個鐘電話，今次《殭》在荷蘭連續 18 日拍攝工作，正好讓兩人繼續傾到不願停。

▲ 《女人俱樂部》是陳嘉寶（左一）和賴慰玲（左二）的首部劇集，二人由此結緣。

問到為何兩人這麼好感情，陳嘉寶說：

我覺得最夾是大家理念一樣，好想進步，又唔搞是非，只是不斷希望做好件事。比如她（賴慰玲）最初唔識面對傳媒，着衫也有點『求其』，但今日佢已經進步了，好了解這一行的生態。

賴慰玲則對好友演技漸見成熟而高興：

她之前曾到美國 New York Film Academy 進修短期演戲課程，現在大家分析起來都會深入一些，她的演出也成熟了。

新聞系畢業的陳嘉寶自言只曾跟彭秀慧學了兩期演戲課程，所以拍《殭》時，常常求教賴慰玲。

她識教人又願意去 share，我最感動的是，有一次我演得麻麻哋，跟着她提示我，我第 2 次真是做得好咗。大家都話這一行競爭大，佢願意咁樣做，我是好 appreciate 的。

為演出做足準備

陳嘉寶在《殭》演男仔頭的何月，賴慰玲演沉迷研究靈異事物的紅髮富家女丘玲梅，問她們可覺得自己和角色相似，賴慰玲對研究靈異事物卻無特別興趣：

我平日唔睇得鬼片㗎。但我似角色咁貪玩，特別喜歡旅行，可以為咗睇一個展覽就會飛去外國睇。

陳嘉寶倒是覺得自己性格有點似角色

何月鍾意幫人出頭，而我都幾有正義感㗎。我都體諒時裝店的 sales 工作辛苦，但若遇到她們對我的親友態度好差，我會和對方理論的。何月完全不貪靚，所以我成套劇都唔多理個樣，最關心打得好不好和射箭姿勢。拍之前，我學了日本弓道，又學過泰拳練體能。

▲ 賴慰玲與陳嘉寶在《殭》分演何月及丘玲梅專追捕殭屍。

《殭》劇裏有不死人和殭屍，她們想擁有哪種超自然力量？賴慰玲半開玩笑說：

有不死人的自癒能力都好，但殭屍唔會老，就一定係最正啦。咁我以後 cream 都唔駛搽，粧又唔駛化，可以做一世花瓶。

陳嘉寶說: 

不老一定是很多人都會追求的，但長生我就未必囉，因為見到身邊人離開世界，自己又無能為力，是痛苦的。

▲ 香港演藝學院畢業，曾於多個劇團的作品中演出，2013 年在劇集《女人俱樂部》中飾演「嫩版張慧儀」。(攝影：陳智良)

▲ 香港樹仁大學新聞傳理系畢業，身兼演員及模特兒。曾參演不少電影，2013 年，她首拍無綫劇集《女人俱樂部》，飾演李若彤的少女版。(攝影：陳智良)

服裝提供：Maje（陳嘉寶）

全文刊於《經濟日報》（收費閱讀）。標題經TOPick編輯修改，原題為『陳嘉寶 賴慰玲專訪 夠《殭》兩小花』